«ՋՋՌ-440 ռեակտորներով Էներգաբլոկի սարքավորումները և շահագործման ռեժիմները»

Գրքի շնորհանդես-քննարկում

Ապրիլի 28,  2017թ.,  ք. Երևան

Նորամուծության և ձեռներեցության ազգային կենտրոնի գիտատեխնիկական գրադարանը կազմակերպում է նվիրատվությամբ ստացված էներգետիկայի ոլորտին վերաբերող «ՋՋՌ-440 ռեակտորներով Էներգաբլոկի սարքավորումները և շահագործման ռեժիմները» գրքի շնորհանդեսը և հանդիպում հեղինակների հետ: Կքննարկվեն հարցեր կապված ատոմային էներգետիկայի անվտանգության, դրա զարգացման առաջնային ուղղությունների, հիմնախնդիրների, ատոմային էներգիայի խաղաղ և անվտանգ օգտագործման, ինչպես նաև այլընտրանքային էներգետիկայի հեռանկարների վերաբերյալ:

       Գրքի հեղինակներն են`

• Արա Սահակյան (տ.գ.թ., Հայասատանի Ազգային պոլիտեխնիկական համալսարանի (ՀԱՊՀ) «Ջերմաէներգետիկայի և շրջակա միջավայրի պաշտպանության» ամբիոնի դոցենտ, Հայկական Ատոմային էլեկտրակայանի ուսումնավարժական կենտրոնի առաջատար ճարտարագետ-տեխնոլոգ)
• Ոստանիկ Մարուխյան (տ.գ.թ., պրոֆեսոր, Հայաստանի Ազգային պոլիտեխնիկական համալսարանի ռեկտոր, միջազգային և Հայաստանի ինժեներական ակադեմիաների իսկական անդամ, ՀԱՊՀ-ի Միջուկային անվտանգության տարածաշրջանային ուսումնական կենտրոնի ղեկավար)
• Վահրամ Պետրոսյան (տ.գ.դ. պրոֆեսոր, միջազգային և Հայաստանի ինժեներական ակադեմիաների իսկական անդամ, «Հայատոմ» ՓԲԸ-ի գլխավոր տնօրեն, Միջուկային անվտանգության միջազգային կենտրոնի ղեկավար, ԱՊՀ երկրների վաստակավոր էներգետիկ):

Միջոցառումը նախատեսված է բուհերի ուսանողների, դասախոսների, գիտահետազոտական կազմակերպությունների և ատոմային էլեկտրակայանների շահագործման, միջուկային անվտանգությունը կարգավորող  մասնագետների և այլ անձանց  համար:

Դասագրքում մանրամասն ներկայացված են ՋՋՌ-440 Էներգաբլոկի հիմնական սարքավորումները, աշխատանքային ռեժիմները, կառավարման սկզբունքները և նրանում ընթացող տեխնոլոգիական պրոցեսները: Դիտարկված են էներգաբլոկի շահագործման ռեժիմները, որոնք վերլուծվել են հայկական ատոմային էլեկտրակայանի անվտանգ շահագործման ապահովման տեսանկյունից:

ԾՐԱԳԻՐ

• Ողջույնի խոսք
• Հեղինակների ելույթներ

Համահեղինակները կներկայացնեն մայրենի լեզվով առաջին անգամ հրատարակված և բավականաչափ տարողունակ արժեքավոր գրքի ստեղծման պատմությանը և նպատակը:

• Քննարկման թեմաներ
• Ատոմային էներգիայի առանցքային դերը երկրի էներգետիկայի զարգացման, էներգետիկ անվտանգության և անկախության ապահովման գործում:
• Հայկական ատոմային էլեկտրակայանի (ՀԱԷԿ) անվտանգության բարձրացման ուղղությամբ իրականացվող աշխատանքները և կայանի ներկայիս վիճակը:
• Այլընտրանքային էներգետիկայի հեռանկարներն ու առանձնահատկությունները:

Մասնակիցները կծանոթանան նաև «Էներգետիկ համակարգի անցյալը, ներկան և ապագան» խորագրով ցուցահանդեսին (առցանց և գրադարանում), որտեղ իրենց ուրույն տեղն  ունեն գրքերը, ատենախոսությունների սեղմագրերը, ամսագրերը, սեղմագրային հանդեսները, արտոնագրային, նորմատիվ-տեխնիկական փաստաթղթերը, արդյունաբերական կատալոգները, ինչպես նաև գրադարանի կողմից տրամադրվող ժամանակակից ծառայություններին:

Միջոցառումը տեղի կունենա 2017թ. ապրիլի 28-ին, ժամը 15:00-ին «Նորամուծության և ձեռներեցության ազգային կենտրոն» ՊՈԱԿ-ում (ք. Երևան, Կոմիտասի 49/3, խորհրդակցությունների դահլիճ, 2-րդ հարկ, կայքէջ` http://www.innovcentre.am/hy/, ֆեյսբուքյան էջ` https://www.facebook.com/InnovCentre):

Կոնտակտային տվյալներ

 Հասարակայնության հետ կապերի և միջոցառումների կազմակերպման բաժին

Հեռ.`011-238747,  էլ. փոստ` adasarg@innovcentre.am