Գիտատեխնիկական գրադարանի մասին
Նորամուծության և ձեռներեցության ազգային Կենտրոն» ՊՈԱԿ-ի վարչական կառուցվածքում գործող գիտատեխնիկական գրադարանը հայտնի է տարածաշրջանում և երկրի սահմաններից դուրս իր մասնագիտացված եզակի հարուստ ֆոնդերով: Գրադարանի առաքելությունն է` գիտատեխնիկական և արտոնագրային ռեսուրսների հավաքագրում, գիտատեխնիկական տեղեկատվական և գրադարանային ծառայությունների մատուցում:
ՆՁԱԿ-ի գրադարանը պետական մասնագիտական գրադարան է, որը հավաքագրում է կիրառական գիտությանը վերաբերող գրադարանային փաստաթղթեր և սպասարկում է ոչ միայն անհատ ընթերցողներին, այլ նաև ընկերություններին, համալսարաններին, պետական գերատեսչություններին, արդյունաբերության տարբեր ոլորտների ձեռնարկություններին:
2022թ. դրությամբ գրադարանի փաստաթղթային ֆոնդը կազմում է շուրջ 22 միլիոն գրադարանային փաստաթուղթ՝ ներառյալ մասնաճյուղերը: Այստեղ են պահվում Հանրապետությունում եզակի գիտատեխնիկական փաստաթղթերի ֆոնդերը՝ արտոնագրային, նորմատիվ-տեխնիկական, արդյունաբերական կատալոգներ, ավանդադրված գիտական աշխատանքներ, փորձարարակոնստրուկտորական և գիտահետազոտական մշակումների հաշվետվություններ, հրատարակված վերլուծական տեսություններ, գրքեր և այլն:
Գրադարան հաճախումների թիվը 2022թ․ կազմել է 13513, կոլեկտիվ աբոնենտների թիվը՝ 238, այդ թվում պայմանագրային՝ 9, իսկ օգտվողների միջին տացքը` 180313 օրինակ գրադարանային փաստաթուղթ՝ ներառյալ մասնաճյուղերը:
ԳՏԳ-ի ընդհանուր և համակարգչային ընթերցասրահներում իրականացվում է գրադարանային-տեղեկատվական սպասարկում, ինչպես նաև արտոնագրային որոնում տարածաշրջանում եզակի` շուրջ 18 միլիոն օրինակ փաստաթղթերից: Համակարգչային սրահում այցելուներն անվճար օգտվում են համացանցից, միջազգային գիտատեխնիկական տեղեկատվական բազաներից (EBSCO, fips.ru, wipo.org, European Patent Office, J-PlatPat, ГПНТБ, eLibrary.ru, jpo.go.jp, SpringerLink, Multidisciplinary Digital Publishing Institute, էլեկտրոնային արխիվ՝ BSTU Dspace, tandfonline.com, russpatent.ru, tandfonline.com, indianchemicalsociety.com և այլն), գրադարանի էլեկտրոնային գրացուցակից` օգտագործելով ժամանակակից տեղեկատվական-հաղորդակցական տեխնոլոգիաներ:
Շահառուների գրադարանային-տեղեկատվական սպասարկումը ժամանակակից տեղեկատվական տեխնոլոգիաների կիրառմամբ կազմակերպելու նպատակով ներդրված է գրադարանային գործընթացների ավտոմատացման «ԻՐԲԻՍ-64» համակարգը, որում մուտքագրված գրառումների թիվը կազմում է շուրջ 374573 փաստաթուղթ՝ ներառյալ ամսագրերի գիտատեխնիկական հոդվածների վերլուծական նկարագրությունները՝ շուրջ 3824 գրառում: Գրադարան մուտք գործող գրականությունը մուտքագրվում է էլեկտրոնային գրացուցակում` համապատասխան տվյալների բազաների կառավարման համակարգերով /IRBIS/: Համացանցի միջոցով, մատչելի որոնողական ապարատով հասանելի է ԳՏԳ-ի էլեկտրոնային գրացուցակը, որում պարբերականների տվյալների բազան պարունակում է ամսագրերի հոդվածների նկարագրություններն իրենց համառոտագրերով (ՏԲ-ն եզակի է հանրապետությունում): Վերջինիս շնորհիվ է հնարավոր իրականացնել փաստաթղթերի Էլեկտրոնային առաքման ծառայությունը:
Վերջին ժամանակներս կրթական համակարգում լայն կիրառություն են ստացել տեսադասախոսությունները, որոնք կրթական արժեքավոր գործիք են ուսանողների, պրոֆեսորադասախոսական անձնակազմի և այլ կրթական հասատությունների, ընթերցողների համար: Այդ իսկ պատճառով գիտատեխնիկական գրադարանը ձևավորել է տարբեր ոլորտներն ընդգրկող՝ էկոնոմիկա, մաթեմատիկա, մեխանիկա, ֆիզիկա, քիմիա, կենսաբանություն, հոգեբանություն և այլն «Ուսումնամեթոդական տվյալների բազա», որը պարբերաբար արդիականացվում է «IRBIS-64» համակարգում: 2022թ. դրությամբ տեսադասախոսությունների թիվը կազմում է 438:
Գրադարանի ավանդական և էլեկտրոնային տեղեկատվական պաշարների հանրահռչակման և հասանելիության ապահովման նպատակով կայքէջում, սոցիալական մի շարք ցանցերի համապատասխան էջերում ներկայացվում են կազմակերպված միջոցառումների, գրադարանային-տեղեկատվական, գիտատեխնոլոգիական ոլորտներին առնչվող գրականության, իրադարձությունների, նորությունների վերաբերյալ առցանց ցուցահանդեսներ:
ՆՁԱԿ-ի գիտատեխնիկական գրադարանն անդամակցում է նոր տեղեկատվական տեխնոլոգիաներից օգտվողների ու մշակողների միջազգային ասոցիացիային (ELNIT):
Գիտատեխնիկական գրադարանի գործընկերներ են`
Պետական հանրային գիտատեխնիկական գրադարան (ГПНТБ)
ԱՊՀ երկրների ԳՏԼ Ազգային տեղեկատվական կենտրոններ և գլխադասային կազմակերպություններ
Գիտատեխնիկական լրատվության միջպետական համակարգող խորհուրդ (МКСНТИ)
Գիտատեխնիկական և նորարարության ոլորտներում համագործակցության միջպետական խորհուրդ (МСНТИ)
Գիտական և տեխնիկական տեղեկատվության համառուսաստանյան ինստիտուտ (ВИНИТИ РАН)
