Նորարարական նանոժապավենը կարող է ցանկացած ակնոց վերածել գիշերային տեսողության սարքի
Ավստրալիայի ազգային համալսարանի հետազոտողները մշակել են նոր հեղափոխական տեխնոլոգիա, որը թույլ կտա մարդկանց պարզ տեսնել մթության մեջ։ Իր տեսակի մեջ առաջին նանոժապավենը թույլ է տալիս գրեթե ցանկացած ապակե սարքի օժտել գիշերային տեսողության հնարավորությամբ: Նոր տեխնոլոգիայի կիրառման շրջանակը կարող է բավականին լայն լինել՝ սովորական մարդկանց այն հնարավորություն կտա ավելի անվտանգ դարձնել գիշերը մեքենա վարելը և գիշերը քայլելը։ Իսկ օրինակ, ոստիկանության և անվտանգության աշխատակիցների համար, ովքեր պարբերաբար օգտագործում են գիշերային տեսողության ներկայիս ծանր սարքերը, աշխատանքը կդառնա ավելի հեշտ և անվտանգ՝ նվազեցնելով պարանոցի քրոնիկական վնասվածքները։
Նոր տեխնոլոգիան ի վիճակի է փոխակերպել ինֆրակարմիր լույսը, որը սովորաբար անտեսանելի է մարդու աչքի համար, և այն վերածել պատկերների, որոնք մարդիկ կարող են հստակ տեսնել ՝ նույնիսկ հեռավորության վրա: Նման փոխակերպման համար ֆոտոններն անցնում են նանոմետր չափի փոքր բյուրեղների միջով՝ դրանք լուսավորելով: Ֆոտոնների քանակն ու դրանց դասավորությունը այս գործընթացի ընթացքում չեն փոխվում, ուստի դրանցից կառուցված վերջնական պատկերն ամբողջությամբ արտացոլում է աշխարհի իրական պատկերը:
Այս նպատակների համար առաջին բյուրեղները ավստրալացի գիտնականները ստացել էին դեռևս 2016 թվականին և այդ ժամանակից ի վեր նրանք աշխատում էին տեխնոլոգիայի պարզեցման վրա, որպեսզի հնարավոր լիներ դրա զանգվածային կիրառումը: Արդյունքում, նրանց հաջողվեց ստանալ շատ թեթև և համեմատաբար էժան նանոժապավեն, որը կարելի է սոսնձել սովորական ապակու վրա, օրինակ՝ ակնոցների կամ ավտոապակու մակերևույթին՝ դրանց գիշերային տեսողության հատկություն տալու համար: Նոր տեխնոլոգիան էներգիա գրեթե չի սպառում և աշխատելու հատուկ պայմաններ չի պահանջում: Ուստի մնում է միայն սպասել այս նանոժապավենի կոմերցիոն տարբերակների վաճառքում հայտնվելուն և փորձարկել այն գործողության մեջ։