ՆՁԱԿ
ՆՁԱԿ
Մարսի մակերեսին առաջին անգամ օրգանական միացությունների հետքեր են հայտնաբերվել. ի՞նչ է դա նշանակում
NASA-ի Perseverance մարսագնացը Մարսի խառնարաններից մեկում օրգանական միացությունների հետքեր է հայտնաբերել:
Հետազոտությունն իրականացրել է տարբեր երկրների գիտնականների միջդիսցիպլինար խումբը, որը վերլուծել է մարսագնացի կողմից հավաքված տվյալները ավելի քան 45 կիլոմետր լայնություն ունեցող Ջեզերո խառնարանում: Սարքը օրգանական մոլեկուլների հետքեր է հայտնաբերել խառնարանի հատակի ժայռերում, որոնք պարունակում են ածխածնի մեկ կամ երկու օղակ։ Այնուամենայնիվ, հետազոտողները դեռ չեն կարողացել հստակ որոշել, թե ինչ տեսակի օրգանական նյութերի մասին է խոսքը:
Հայտնաբերված օրգանական մոլեկուլների բնույթի և բաշխման տարբերությունները ցույց են տալիս, որ Մարսի վրա տեղի են ունեցել ջրային միջավայրի փոփոխման տարբեր գործընթացներ։ Սա կարող է վկայել մոլորակի վրա տարբեր օրգանական նյութերի առկայության մասին: Սակայն հայտնաբերված նյութերի օրգանական ծագման վերջնական հաստատման համար անհրաժեշտ է նմուշները վերադարձնել Երկիր և ուսումնասիրել դրանք այստեղ։
Նմուշները վերադարձնել նախատեսվում է Mars Sample Return առաքելության շրջանակում, որը կարող է սկսվել 2027-ին։ Դրանց ուսումնասիրությունը նոր հնարավորություններ կբացի գիտական հանրության համար և կընդլայնի մարդկության գիտելիքները Կարմիր մոլորակի մասին:
Գիտնականները նշում են, որ Մարսի մակերեսին օրգանական նյութերի առկայությունը և բաշխումը մեծ նշանակություն ունի մոլորակի վրա ածխածնի ցիկլի և դրա պատմության ընթացքում կյանքի գոյության հավանականությունը հասկանալու համար։ Օրգանական միացությունների հետքերի հայտնաբերումը հաստատում է, որ Մարսը առաջնահերթ նշանակության գիտական հետազոտության օբյեկտ է։
Այս հայտնագործությունը նոր գլուխ է բացում Մարսի հետազոտության մեջ և խթանում է հետագա գիտական հետազոտությունները մոլորակի վրա հնարավոր կյանքի գոյության և դրա պատմության վերաբերյալ հարցերի պատասխանների որոնման մեջ: Յուրաքանչյուր նոր հայտնագործություն մարդկությանն ավելի է մոտեցնում խորհրդավոր կարմիր հարևանի բնույթը հասկանալուն և ընդլայնում է մեր հորիզոնները տիեզերքի ուսումնասիրության և դրանում մարդկության տեղը փնտրելու հարցում:
Հիշեցնենք, որ Perseverance-ն ուսումնասիրում է Մարսի Ջեզերո խառնարանը, որում միլիարդավոր տարիներ առաջ, ամենայն հավանականությամբ, եղել է մեծ լիճ և գետի դելտա: Մարսագնացը փնտրում է երկարատև կյանքի նշաններ և հավաքում հողի տասնյակ նմուշներ, որոնք հետո հետազոտվում են Երկրի վրա:
Վերջերս NASA Perseverance-ը Մարսի վրա լուսանկարել է նաև բլիթի նման մի հետաքրքիր քար, որի կենտրոնում անցք կա:
