ՆՁԱԿ
ՆՁԱԿ
Մեծ Բրիտանիայի տասը արտասովոր թանգարանները
Բրիտանական «Դը թելեգրաֆ» (The Telegraph) հրատարակչությունը հրապարակել է Մառախլապատ Ալբիոնի տասը ամենաարտասովոր թանգարանների ցանկը:
Լիդսկ ամրոցում է գտնվում Շների վզնոցների թանգարանը, որտեղ ներկայացված է ավելի քան 100 ցուցանմուշ: Դրանք վերաբերում են հիմնականում միջնադարին և ոչ միայն պարզապես վզնոցներ են, այլ նաև արվեստի գործեր:
Ռագբիում գտնվող Մանկական հին սայլակների թանգարանում ներկայացված ցուցանմուշների հարուստ հավաքածուում ոչ միայն սովորական քառանիվ օրորոցներ են, այլև բարդ կառուցվածքով սայլակներ` նախատեսված երկվորյակների համար, ինչպես նաև զբոսասայլակներ, որոնք կարող են դառնալ փոքրիկ սեղան և աթոռ:
Սաութփորթի Խոտհունձ մեքենաների թանգարան հնարավոր է այցելել` վճարելով ընդամենը երկու ֆունտ: Այստեղ ոչ միայն կարելի է դիտել ամբողջ հավաքածուն, այլև մանրանասն տեղեկություններ ստանալ այս կամ այն մեխանիզմի պատմության և տվյալ թանգարանում հայտնվելու մասին: Արքայադուստր Դիանայի և Չառլզի խոտհունձ մեքենան ևս, որով մշակել են սիզամարգերը,այս թանգարանում է: Մեկ այլ տաղավարում կարելի է տեսնել մրցարշավի մեքենաներ, որոնք սարքավորվել են սովորական խոտհունձ մեքենայի հիմքի վրա:
Մեծ Բրիտանիայի խորհրդանիշներից մեկին նվիրված` Լոնդոնի Թավշյա արջուկների թանգարանում կարելի է տեսնել խաղալիքներ, որոնք այս կամ այն պատմական իրադարձության վկան են և պատկանել են հայտնի անձանց: Ներկայացված են նաև թավշյա արջուկների եզակի նմուշներ:
Պետերբորոյում` Քեմբրիջշիրում գտնվող Ճպուռի թանգարանի ստեղծողները հավաստում են, որ նման ցուցադրության նպատակը երկարաթև միջատների հանդեպ մարդկանց մեջ գութ արթնացնելն է և նրանց արտասովոր վարքը ներկայացնելը:
Քոռնուոլի Կախարդության թանգարանում հավաքված են առարկաներ, որոնք առնչվում են հմայության հետ: Այստեղ կարելի է տեսնել վհուկի դանակից մինչև չորացած խոտեր, ձեռքի ափով, ծխի միջոցով, ջրով լի բաժակով, հայելիով, օձերի շարժման միջոցով, բզեզի շարժման միջոցով գուշակություններ անելու պարագաներ:
Նորուիքում գտնվող` համեմունքներ արտադրող հանրահայտ ընկերության խանութին կից գործում է մի փոքրիկ թանգարան` Մանանեխի թանգարանը: Այստեղ կարելի է իմանալ տարբեր վայրերում աճող, տարբեր համեր ունեցող, տարբեր բաղադրատոմսերով պատրաստվող մանանեխի մասին:
Քեսուիքի Մատիտի թանգարանը գտնվում է Շոտլանդիայի սահմանի մոտ, որտեղից 17-19 դդ. արտահանվել է գրաֆիտ: Ցուցանմուշները ևս նվիրված են պատմության այդ էջերին: Ներկայացված են նաև զանազան արտասովոր մատիտներ, որոնցով կարելի է նկարել սովորել: Թանգարանի այցելուները չեն դիմանում գայթակղությանը և բազմաթիվ գնումներ են կատարում թանգարանում գործող գրենական պիտույքների խանութի չափազանց մեծ տեսականուց:
Ջուտի թանգարանը գտնվում է շոտլանդական փոքրիկ Դունդե քաղաքում, որն անցյալում փառաբանվում էր ջուտի արտադրության ֆաբրիկաներով, որոնցում տեղադրված էին ժամանակակից սարքավորումներ, և բնակչության մեծ մասը օգտվում էր նրա արտադրանքից: Ժամանակի ընթացքում ջուտի պահանջարկը նվազեց, և մեկը մյուսի հետևից փակվեցին բոլոր ֆաբրիկաները, իսկ նրանցից մեկը` «Վերդանթ վորքսը», վերածվեց թանգարանի:
Նոթինգ Հիլի Փաթեթավորման թանգարանը ստեղծվել է 16-ամյա մի տղայի շնորհիվ, որը 200 տարի առաջ հավաքել է թխվածքաբլիթի փաթեթներ: Հենց այդ փաթեթներն էլ հետագայում դարձել են թանգարանի ստեղծման հիմքը: Ներկայումս փաթեթավորման թանգարանում հաշվվում է 10 հազար ցուցանմուշ, որոնք առնչվում են սպառողական ապրանքների վաճառքի ինդուստրիայի հետ:
