ՆՁԱԿ
ՆՁԱԿ
Արհեստական ինտելեկտն առանց կանոնակարգման կարող է հանգեցնել զանգվածային ոչնչացման զենքերի տարածման.
Արհեստական ինտելեկտի (ԱԻ) ոլորտը մեծ հնարավորություններ է տալիս մարդկությանը, բայց եթե ԱԻ-ն չկարգավորվի, ապա այն կարող է հեշտացնել հանցագործների համար զանգվածային ոչնչացման զենք ստեղծելը: Այս մասին հայտարարել է Մեծ Բրիտանիայի վարչապետ Ռիշի Սունակը։
«Ես անկեղծորեն հավատում եմ, որ արհեստական ինտելեկտի նման տեխնոլոգիաները կունենան նույն հեռուն գնացող ազդեցությունները, ինչ Արդյունաբերական հեղափոխությունը, էլեկտրիֆիկացումը և ինտերնետի գալուստը: Ինչպես տեխնոլոգիայի նախկին առաջընթացի դեպքում, ԱԻ-ն կբերի նոր գիտելիքներ և նոր հնարավորություններ տնտեսական աճի համար՝ ընդլայնելով մարդկային կարողությունները և հույս կտա լուծելու այն խնդիրները, որոնք նախկինում մեր հասանելիությունից դուրս էին: Բայց արհեստական ինտելեկտը նաև նոր սպառնալիքներ և վախեր է բերում»,- ասել է Մեծ Բրիտանիայի վարչապետը՝ Լոնդոնում արհեստական ինտելեկտի զարգացման մասին իր ելույթում։
«Սխալ վերաբերմունքի դեպքում արհեստական ինտելեկտը կարող է հեշտացնել քիմիական կամ կենսաբանական զենքի ստեղծումը: Ահաբեկչական խմբավորումները կարող են օգտագործել արհեստական ինտելեկտը՝ ավելի մեծ մասշտաբով վախ և ավերածություններ սերմանելու համար: Հանցագործները կարող են ԱԻ-ն օգտագործել կիբերհարձակումների, ապատեղեկատվության և խարդախության համար: Իսկ ամենաքիչ հավանական և ծայրահեղ սցենարները ցույց են տալիս, որ վտանգ կա, որ մարդկությունը կարող է ամբողջությամբ կորցնել ինտելեկտի վերահսկողությունը», - ասել է Սունակը:
Նա ընդգծել է, որ բրիտանական կառավարությունն այս փուլում մտադիր չէ արհեստական ինտելեկտի վերաբերյալ օրենսդրություն ընդունել, այլ ցանկանում է ավելի լավ «հասկանալ և գնահատել արհեստական ինտելեկտի մոդելների անվտանգությունը», և, հետևաբար, իշխանությունները 100 միլիոն ֆունտ (120 միլիոն դոլար) են հատկացրել աշխատանքային խումբը ստեղծելու համար, որում ներառված են լինելու «Արհեստական ինտելեկտի աշխարհի ամենահարգված և գրագետ գործիչները»։ Սունակը նաև հայտարարեց, որ Մեծ Բրիտանիան կստեղծի աշխարհում առաջին ԱԻ անվտանգության ինստիտուտը։
